www.ranjithkumarak.blogspot.in
************************
പരിസ്ഥിതി ദിനമായ ജൂണ്‍ അഞ്ചിന് വിദ്യാലയങ്ങളിലും വിദ്യാര്‍ത്ഥികളുടെ വീടുകളിലും നടുന്നതിന് പൊതുവിദ്യാഭ്യാസ വകുപ്പിന് കീഴില്‍ സ്‌കൗട്ട്‌സ് ആന്റ് ഗൈഡ്‌സ്, സ്റ്റുഡന്റ് പോലീസ് കേഡറ്റ് (എസ്.പി.സി), ജൂനിയര്‍ റെഡ്‌ക്രോസ് (ജെ.ആര്‍.സി) വോളണ്ടിയര്‍മാരുടെ സഹകരണത്തോടെ 60 ലക്ഷം ഫല വൃക്ഷത്തൈകള്‍ ഉത്പാദിപ്പിക്കും. ഇതു സംബന്ധിച്ചു ആലോചനാ യോഗം പൊതുവിദ്യാഭ്യാസ അഡീഷണല്‍ ഡയറക്ടറുടെ (ജനറല്‍) അധ്യക്ഷതയില്‍ നടന്നു. സ്‌കൗട്ട്‌സ് ആന്റ് ഗൈഡ്‌സ് 40 ലക്ഷവും സ്റ്റുഡന്റ് പോലീസ് കേഡറ്റ്‌സ് 12 ലക്ഷവും ജൂനിയര്‍ റെഡ്‌ക്രോസ് എട്ട് ലക്ഷവും തൈകള്‍ തയ്യാറാക്കും. ഫലവൃക്ഷത്തൈകള്‍ തയ്യാറാക്കുന്നതിനുള്ള വിത്ത് പാകല്‍ ഉദ്ഘാടനം 24ന് സ്‌കൗട്ട്‌സ് ആസ്ഥാനത്ത് നടക്കും. സംസ്ഥാന ഫലമായി ചക്കയെ തെരെഞ്ഞെടുത്തിട്ടുള്ള സാഹചര്യത്തില്‍ എല്ലാ വിദ്യാലയങ്ങളിലും ഒരു പ്ലാവിന്‍ തൈ എങ്കിലും നടുക എന്നതാണ് ലക്ഷ്യം.Dt.20.4.2018.
************************
സെക്രട്ടേറിയറ്റ് മുതല്‍ ഗ്രാമതലങ്ങള്‍ വരെയുളള എല്ലാ സര്‍ക്കാര്‍ ഓഫീസുകളിലും ഗ്രീന്‍ പ്രോട്ടോകോള്‍ നടപ്പിലാക്കണമെന്ന് ചീഫ് സെക്രട്ടറി പോള്‍ ആന്റണിയുടെ അധ്യക്ഷതയില്‍ സെക്രട്ടേറിയറ്റ് ദര്‍ബാര്‍ ഹാളില്‍ ചേര്‍ന്ന യോഗം തീരുമാനിച്ചു. ലോകപരിസ്ഥിതിദിനമായ ജൂണ്‍ അഞ്ചിന് എല്ലാ സര്‍ക്കാര്‍ സ്ഥാപനങ്ങളിലും ഗ്രീന്‍പ്രോട്ടോകോള്‍ പ്രഖ്യാപനം നടത്തുന്നതിനാവശ്യമായ നടപടികള്‍ സ്വീകരിക്കുന്നതിനും യോഗം തീരുമാനിച്ചു. ലോകപരിസ്ഥിതി ദിനത്തില്‍ കേരളത്തിലെ സര്‍ക്കാര്‍ ഓഫീസുകളില്‍ ഗ്രീന്‍പ്രോട്ടോകോള്‍ നടപ്പിലാക്കി പ്രഖ്യാപനം നടത്തുന്നതിനാവശ്യമായ നടപടികള്‍ എല്ലാ വകുപ്പ് മേധാവികളും സ്വീകരിക്കണം. ഗ്രീന്‍പ്രോട്ടോകോള്‍ നടപ്പിലാക്കുന്നതിനുളള നിര്‍ദേശങ്ങള്‍ സംബന്ധിച്ച് സര്‍ക്കാര്‍ സര്‍ക്കുലര്‍ പുറപ്പെടുവിക്കും. സംസ്ഥാനത്തെ സര്‍ക്കാര്‍ ഓഫീസുകളില്‍ ഗ്രീന്‍പ്രോട്ടോകോള്‍ നടപ്പിലാക്കുന്നത് സംബന്ധിച്ച് കര്‍മ്മപദ്ധതി ശുചിത്വ മിഷന്‍ എക്‌സിക്യൂട്ടീവ് ഡയറക്ടര്‍ ഡോ. ആര്‍ അജയകുമാര്‍ വര്‍മ്മ യോഗത്തില്‍ അവതരിപ്പിച്ചു. എല്ലാ ഓഫീസിലും ഗ്രീന്‍പ്രോട്ടോകോള്‍ കമ്മിറ്റി രൂപീകരിച്ച് നോഡല്‍ ഓഫീസറെ നിയോഗിക്കും. അഴുകുന്നതും അഴുകാത്തതുമായ മാലിന്യം തംതിരിച്ച് ശേഖരിക്കാനായി പ്രത്യേകം ബിന്നുകള്‍ അതത് സ്ഥാപനങ്ങളില്‍ സ്ഥാപിക്കുകയും അഴുകാത്ത മാലിന്യങ്ങള്‍ ശേഖരിക്കാന്‍ പ്രത്യേകം സ്ഥലം കണ്ടെത്തുകയും ചെയ്യണം. എല്ലാ പൊതു ചടങ്ങുകളിലും പ്രചാരണങ്ങള്‍ക്കും തുണി ബാനറുകളും ബോര്‍ഡുകളും ഉപയോഗിക്കുന്നു എന്നുറപ്പാക്കുകയും വേണം. പുനരുപയോഗിക്കാവുന്ന പാത്രങ്ങളില്‍ മാത്രമേ ആഹാരം കൊണ്ടു വരാവൂ എന്ന് മേധാവികള്‍ ജീവനക്കാരോട് നിര്‍ദേശിക്കണം. മെയ് 15നകം ഓഫീസുകളില്‍ പ്ലാസ്റ്റിക് ക്യാരി ബാഗ് നിരോധിക്കുകയും, ഓഫീസിലുണ്ടാകുന്ന ജൈവമാലിന്യങ്ങളുടെ തോതനുസരിച്ചുളള കമ്പോസ്റ്റ് ഉപാധികള്‍ സ്ഥാപിക്കുകയും കമ്പോസ്റ്റിംഗ് പ്രവര്‍ത്തനങ്ങള്‍ ആരംഭിക്കുകയും ചെയ്യണം. സ്റ്റീല്‍, പോര്‍സലൈന്‍ കപ്പുകളും പ്ലേറ്റുകളും വാങ്ങുക, നിശ്ചിത ഇടവേളകളില്‍ അജൈവ പാഴ് വസ്തുക്കള്‍ ശേഖരിക്കാന്‍ തദ്ദേശ സ്ഥാപനവുമായോ, പാഴ് വസ്തു വ്യാപാരികളുമായോ, ക്ലീന്‍ കേരള കമ്പനിയുമായി ധാരണയിലെത്തുക, ടോയ്‌ലറ്റുകള്‍ സ്ത്രീ സൗഹൃദമാക്കുക, ടോയ്‌ലെറ്റുകളില്‍ വെളളവും വെളിച്ചവും വൃത്തിയും ഉറപ്പാക്കുക തുടങ്ങിയ നടപടികള്‍ മെയ് 31നകം സ്വീകരിക്കണം. തരം തിരിച്ച് ശേഖരിച്ച അജൈവ മാലിന്യം നീക്കം ചെയ്യുന്നതിനുളള സംവിധാനം സംബന്ധിച്ച വിവരം എല്ലാ സ്ഥാപനങ്ങള്‍ക്കും നല്‍കുന്നതിനുളള നടപടികള്‍ അതത് തദ്ദേശ സ്വയംഭരണ സ്ഥാപനങ്ങള്‍ സ്വീകരിക്കണമെന്നും കര്‍മ്മ പദ്ധതിയില്‍ പറയുന്നു. ഹരിതകേരളം മിഷന്‍ എക്‌സിക്യൂട്ടീവ് വൈസ് ചെയര്‍പേഴ്‌സണ്‍ ഡോ. ടി. എന്‍.സീമ, അഡീഷണല്‍ ചീഫ് സെക്രട്ടറിമാര്‍, പ്രിന്‍സിപ്പല്‍ സെക്രട്ടറിമാര്‍, സെക്രട്ടറിമാര്‍, വകുപ്പ് മേധാവികള്‍ എന്നിവര്‍ യോഗത്തില്‍ പങ്കെടുത്തു.Dt.19.4.2018.
************************
സംസ്ഥാനത്തെ എട്ടുമുതല്‍ പന്ത്രണ്ടുവരെയുള്ള മുഴുവന്‍ സര്‍ക്കാര്‍-എയ്ഡഡ് സ്‌കൂളുകളിലുമായി 45000 ക്ലാസ് മുറികള്‍ ഹൈടെക്കാക്കുന്നതിന്റെ ഭാഗമായുള്ള മൂന്നാംഘട്ട വിന്യാസത്തിന് സ്‌കൂളുകള്‍ ഏപ്രില്‍ 22 ന് മുന്‍പ് വിശദാംശങ്ങള്‍ നല്‍കണം. ആദ്യ രണ്ടുഘട്ടങ്ങളിലായി 33775 ക്ലാസ്മുറികള്‍ ഹൈടെക്കാക്കുന്നതിനുള്ള സംവിധാനങ്ങള്‍ ലഭ്യമാക്കിയിരുന്നു. ഇതിന്റെ ഭാഗമായി 2969 സ്‌കൂളുകളിലെ മുഴുവന്‍ ക്ലാസ് മുറികളും ഹൈടെക്കായി. ഏപ്രില്‍ 20 വരെ സജ്ജമായതും മെയ് 18 നു മുന്‍പ് സജ്ജമാക്കാന്‍ കഴിയുന്നതുമായ ക്ലാസ്മുറികളുടെ എണ്ണം സ്‌കൂളുകള്‍ മൂന്നാംഘട്ട വിതരണത്തിന് കൈറ്റിന്റെ ജില്ലാ ഓഫീസില്‍ ലഭ്യമാക്കണം. കൈറ്റ് കോ-ഓര്‍ഡിനേറ്റര്‍മാര്‍ സ്‌കൂള്‍ സന്ദര്‍ശനം നടത്തി ഉറപ്പാക്കിയശേഷം ഏപ്രില്‍ അവസാനവാരത്തില്‍ മൂന്നാംഘട്ട ഹൈടെക് വിന്യാസം നടത്തും. ജൂണ്‍ മാസത്തോടെ മുഴുവന്‍ ക്ലാസ് മുറികളിലും ഹൈടെക് പദ്ധതി നടപ്പാക്കുന്ന രൂപത്തിലാണ് പ്രവര്‍ത്തനങ്ങള്‍ മുന്നോട്ടു പോവുന്നത്. ഹൈടെക് ക്ലാസ് മുറികളില്‍ പ്രയോജനപ്പെടുത്തുന്നതിനുള്ള 'സമഗ്ര' റിസോഴ്‌സ് പോര്‍ട്ടല്‍ തയ്യാറായിക്കഴിഞ്ഞു. ബ്രോഡ്ബാന്‍ഡ് ഇന്റര്‍നെറ്റ് എല്ലാ സ്‌കൂളുകള്‍ക്കും ലഭ്യമാക്കി. 'സമഗ്ര' ഉപയോഗിച്ച് ഹൈടെക് ക്ലാസ് മുറികളില്‍ പഠിപ്പിക്കുന്നതിന് ഒരുലക്ഷം അധ്യാപകര്‍ക്ക് പ്രത്യേക പരിശീലനം ഏപ്രില്‍ 24 മുതല്‍ എല്ലാ ജില്ലകളിലുമായി 656 കേന്ദ്രങ്ങളില്‍ നടക്കും. ഹൈടെക് സ്‌കൂള്‍ പദ്ധതിയുടെ ഭാഗമായി നിയോജക മണ്ഡലം അടിസ്ഥാനത്തില്‍ മുഴുവന്‍ സ്‌കൂളുകളുടേയും വിശദാംശങ്ങള്‍ www.kite.kerala.gov.in ല്‍ ലഭിക്കും.Dt.17.4.2018.
************************
തിരുവനന്തപുരത്ത് തൈക്കാട് പ്രവര്‍ത്തിക്കുന്ന ദേശീയ തൊഴില്‍ സേവന കേന്ദ്രം, പട്ടികജാതി/വര്‍ഗത്തില്‍പ്പെട്ട ഉദ്യോഗാര്‍ത്ഥികളുടെ തൊഴില്‍ സാധ്യത വര്‍ദ്ധിപ്പിക്കുന്നതിന് 11 മാസം ദൈര്‍ഘ്യമുളള സൗജന്യ പരിശീലന പരിപാടി നടത്തും. ടൈപ്പ്‌റൈറ്റിംഗ്, ഷോര്‍ട്ട് ഹാന്റ്, കമ്പ്യൂട്ടര്‍, ഇംഗ്ലീഷ്, കണക്ക്, ജനറല്‍നോളജ് വിഷയങ്ങളിലാണ് പരിശീലനം. കോഴ്‌സ് പഠിപ്പിക്കുന്ന സ്ഥാപനത്തിന് ഒരു കുട്ടിക്ക് പ്രതിമാസം 800 രൂപ നിരക്കില്‍ ഫീസ് ലഭിക്കും. എല്ലാ സൗകര്യങ്ങളോടും, അംഗീകൃതവും, വരുമാന നികുതി സംബന്ധിച്ച് റിട്ടേണ്‍ ഫയല്‍ ചെയ്യുന്നതും, മൂന്നു വര്‍ഷമോ അതിലധികമോ പ്രവൃത്തി പരിചയവുമുളള സ്ഥാപനങ്ങള്‍ക്ക് ഏപ്രില്‍ 30ന് അഞ്ചിന് മുമ്പ് അപേക്ഷ നല്‍കാം. കൂടുതല്‍ വിവരങ്ങള്‍ക്ക് സബ് റീജിയണല്‍ എംപ്ലോയ്‌മെന്റ് ഓഫീസര്‍, നാഷണല്‍ കരിയര്‍ സര്‍വീസ് സെന്റര്‍ ഫോര്‍ എസ്.സി/എസ്.റ്റി, തൈക്കാട്, തിരുവനന്തപുരം -14 എന്ന വിലാസത്തിലോ 0471 2332113 എന്ന നമ്പരിലോ ബന്ധപ്പെടണം.Dt.16.4.2018.
************************
നവോദയ വിദ്യാലയ പ്രവേശനത്തിനുള്ള അഡ്മിറ്റ് കാര്‍ഡുകള്‍ തയ്യാറായി. നവോദയ വിദ്യാലയ സമിതി വിദ്യാര്‍ത്ഥികളുടെ രജിസ്‌ട്രേഷന്‍ നമ്പര്‍ എസ്. എം. എസ് മുഖേന അറിയിച്ചിട്ടുണ്ട്. ഏപ്രില്‍ 21ന് നടക്കുന്ന പരീക്ഷയുടെ പ്രവേശന കാര്‍ഡുകള്‍ www.nvshq.org ല്‍ നിന്ന് ഡൗണ്‍ലോഡ് ചെയ്യുകയോ ബന്ധപ്പെട്ട നവോദയ വിദ്യാലയത്തില്‍ നിന്നും വാങ്ങുകയോ ചെയ്യാം. വിശദ വിവരങ്ങള്‍ക്ക്: 7286835226.Dt.11.4.2018.
************************
2017 സെപ്റ്റംബറില്‍ നടന്ന ഹയര്‍സെക്കണ്ടറി തുല്യതാ പരീക്ഷയുടെ (ഒന്നാം വര്‍ഷ ഇംപ്രൂവ്‌മെന്റ്) സ്‌കോര്‍ഷീറ്റ് പരീക്ഷാര്‍ത്ഥികള്‍ 2016 ഓഗസ്റ്റിലെ ഹയര്‍സെക്കണ്ടറി ഒന്നാം വര്‍ഷ തുല്യതാ പരീക്ഷയ്ക്ക് രജിസ്‌ട്രേഷന്‍ നടത്തിയ സ്‌കൂളുകളിലെ പ്രിന്‍സിപ്പാളില്‍ നിന്നും കൈപ്പറ്റണം.Dt.11.4.2018.
************************
സംസ്ഥാന വിദ്യാഭ്യാസ വകുപ്പും എസ്.സി.ഇ.ആര്‍.ടി യും സംയുക്തമായി നടത്തുന്ന ന്യൂമാറ്റ്‌സ് പദ്ധതിയില്‍ അംഗങ്ങളായ ആറു മുതല്‍ 11 വരെ ക്ലാസുകളില്‍ പഠിക്കുന്ന കുട്ടികളുടെ ഈ വര്‍ഷത്തെ അവധിക്കാല സഹവാസ ക്യാമ്പ് ഏപ്രില്‍ 17 മുതല്‍ 26 വരെ തിരുവനന്തപുരം മൈലം ജി.വി.രാജാ സ്‌പോര്‍ട്‌സ് സ്‌കൂളില്‍ നടത്തും. എല്ലാ കുട്ടികളും ഏപ്രില്‍ 17 ന് രാവിലെ 9.30 ന് മൈലം ജി.വി.രാജാ സ്‌പോര്‍ട്‌സ് സ്‌കൂളില്‍ എത്തണമെന്ന് ഡയറക്ടര്‍ അറിയിച്ചു.Dt.9.4.2018.
************************
സംസ്ഥാനത്തെ പ്രൈമറി സ്‌കൂള്‍ ഐ.ടി. കോ-ഓര്‍ഡിനേറ്റര്‍മാര്‍ക്കുള്ള നാലുദിന പരിശീലനം നാളെ മുതല്‍ ആരംഭിക്കും. ഹൈസ്‌ക്കൂള്‍-ഹയര്‍സെക്കന്ററി വിഭാഗങ്ങളോട് ചേര്‍ന്നും സ്വതന്ത്രമായും പ്രവര്‍ത്തിക്കുന്ന പ്രൈമറി-അപ്പര്‍ പ്രൈമറി വിഭാഗത്തിലെ 11,000-ലധികം ഐ.ടി. കോ-ഓര്‍ഡിനേറ്റര്‍മാരായ (പി.എസ്.ഐ.ടി.സി.) അധ്യാപകര്‍ക്കാണ് ഏപ്രില്‍ 24 നകം രണ്ടു ബാച്ചുകളിലായി എല്ലാ ജില്ലകളിലും ഐ.ടി. പരിശീലനം നല്‍കുന്നത്. പ്രൈമറി സ്‌കൂളുകളിലെ ഐ.സി.ടി. പ്രവര്‍ത്തനങ്ങളുമായി ബന്ധപ്പെട്ട പ്രവര്‍ത്തനങ്ങള്‍ ഏറ്റെടുത്ത് നടത്താനും സാങ്കേതിക പ്രശ്‌നങ്ങളുണ്ടായാല്‍ അത് സ്‌കൂളുകളില്‍ത്തന്നെ പരിഹരിക്കാനും കോ-ഓര്‍ഡിനേറ്റര്‍മാരെ സജ്ജമാക്കുന്ന തരത്തിലാണ് പരിശീലനം. ഓപ്പറേറ്റിംഗ് സിസ്റ്റം, ഓഫീസ് പാക്കേജുകള്‍ എന്നിവയുടെ ഉപയോഗം, സമ്പൂര്‍ണ സ്‌കൂള്‍ മാനേജ്‌മെന്റ് സോഫ്റ്റ്‌വെയര്‍, 'സമഗ്ര' ലേണിംഗ് മാനേജ്‌മെന്റ് പോര്‍ട്ടല്‍, ബ്രോഡ്ബാന്‍ഡ് ഇന്റര്‍നെറ്റ് പ്രയോജനപ്പെടുത്തല്‍, വിവിധ വിഷയങ്ങള്‍ക്കുള്ള ഐ.ടി. അധിഷ്ഠിത ഉള്ളടക്കം, ഭാഷാ കമ്പ്യൂട്ടിംഗ്, ഇന്‍സ്റ്റലേഷന്‍-ട്രബിള്‍ ഷൂട്ടിംഗ് തുടങ്ങിയവ പരിശീലനത്തില്‍ ഉള്‍പ്പെടുത്തിയിട്ടുണ്ട്. ഓണ്‍ലൈനില്‍ രജിസ്റ്റര്‍ ചെയ്ത അധ്യാപകര്‍ക്കാണ് ഒരേസമയം 230 കേന്ദ്രങ്ങളിലായി പരിശീലനം ക്രമീകരിച്ചിരിക്കുന്നത്. പൊതുവിദ്യാഭ്യാസ സംരക്ഷണയജ്ഞത്തിന്റെ ഭാഗമായി എട്ടു മുതല്‍ പന്ത്രണ്ടുവരെ യുള്ള ക്ലാസുകള്‍ ഹൈടെക്കാക്കുന്നതിന്റെ തുടര്‍ച്ചയായി ഈ വര്‍ഷം തന്നെ മുഴുവന്‍ പ്രൈമറി വിഭാഗങ്ങള്‍ക്കും ഹൈടെക് ലാബുകള്‍ സ്ഥാപിക്കുന്നതിന്റെ ആദ്യ ഘട്ടമാണ് ഈ പരിശീലനമെന്ന് കൈറ്റ് വൈസ് ചെയര്‍മാന്‍ കെ.അന്‍വര്‍ സാദത്ത് അറിയിച്ചു.Dt.9.4.2018.
************************
ഏപ്രില്‍ 26 ന് നടത്താന്‍ നിശ്ചയിച്ചിരുന്ന ഡി.എഡ് രണ്ട്, നാല് സെമസ്റ്റര്‍ പരീക്ഷകള്‍ ഏപ്രില്‍ 30 ന്. മറ്റ് പരീക്ഷകള്‍ക്കും സമയത്തിനും മാറ്റമില്ല. പുതുക്കിയ ടൈം ടേബിള്‍ പരീക്ഷാഭവന്റെ വെബ്‌സൈറ്റില്‍ (www.keralapareekshabhavan.in) ലഭ്യമാണ്.Dt.6.4.2018.
************************
തൃശൂരില്‍ നടന്ന സംസ്ഥാന സ്‌കൂള്‍ കലോല്‍സവത്തില്‍ എ ഗ്രേഡ് നേടിയ പട്ടികജാതി വിഭാഗത്തില്‍പ്പെട്ട കലാ പ്രതിഭകള്‍ക്ക് 10,000 രൂപ ക്യാഷ് അവാര്‍ഡ് ലഭിക്കുന്ന പ്രോത്സാഹന പദ്ധതിയിലേക്ക് അപേക്ഷിക്കാം. എ ഗ്രേഡ് നേടിയവര്‍ നിശ്ചിത മാതൃകയിലുള്ള അപേക്ഷ, ജാതി സര്‍ട്ടിഫിക്കറ്റ്, എ ഗ്രേഡ് നേടിയ സര്‍ട്ടിഫിക്കറ്റിന്റെ ഗസറ്റഡ് ഓഫീസര്‍ സാക്ഷ്യപ്പെടുത്തിയ പകര്‍പ്പ്, നിശ്ചിത മാതൃകയിലുള്ള വിദ്യാര്‍ത്ഥിയുടെ ഫോട്ടോ പതിച്ച തിരിച്ചറിയല്‍ കാര്‍ഡ് എന്നിവ അപേക്ഷകന്‍ പഠിച്ച സ്ഥാപന മേധാവിയുടെ ശുപാര്‍ശ രേഖപ്പെടുത്തി മേയ് 15 ന് വൈകുന്നേരം അഞ്ച് മണിക്ക് മുമ്പ് ചീഫ് പബ്ലിസിറ്റി ഓഫീസര്‍, പട്ടികജാതി വികസന വകുപ്പ്, അയ്യന്‍കാളി ഭവന്‍, കനക നഗര്‍, കവടിയാര്‍ പിഒ., തിരുവനന്തപുരം - 695003 എന്ന വിലാസത്തില്‍ ലഭ്യമാക്കണം. അപേക്ഷകരെ നേരിട്ട് ബന്ധപ്പെടാനുള്ള ഫോണ്‍ നമ്പര്‍, പിന്‍കോഡ് സഹിതമുള്ള മേല്‍വിലാസം എന്നിവ അപേക്ഷയില്‍ രേഖപ്പെടുത്തിയിരിക്കണം. അപേക്ഷയുടെ മാതൃക ജില്ലാ പട്ടികജാതി വികസന ഓഫീസുകളില്‍ ലഭിക്കും. കൂടുതല്‍ വിവരങ്ങള്‍ക്ക് 0471 - 2737218.Dt.7.4.2018.
************************
സ്‌കോള്‍കേരളയില്‍ നിന്ന് 2016-18 ബാച്ചില്‍ ഹയര്‍സെക്കണ്ടറി കോഴ്‌സ് ഓപ്പണ്‍ റെഗുലര്‍ വിഭാഗത്തില്‍ പഠനം പൂര്‍ത്തിയാക്കിയ വിദ്യാര്‍ത്ഥികളുടെ ടി.സി-യും, കോണ്‍ഡക്ട് സര്‍ട്ടിഫിക്കറ്റും വിതരണം നടത്തും. ട്രാന്‍സ്ഫര്‍ സട്ടിഫിക്കറ്റ് സ്‌കോള്‍-കേരള ജില്ലാ ഓഫീസുകള്‍ വഴിയും,കോണ്‍ഡക്ട് സര്‍ട്ടിഫിക്കറ്റ് പഠന കേന്ദ്രങ്ങള്‍ വഴിയുമാണ് വിതരണം നടത്തുന്നത്. വിദ്യാര്‍ത്ഥികള്‍ സ്‌കോള്‍ കേരള അനുവദിച്ചിട്ടുള്ള തിരിച്ചറിയല്‍ കാര്‍ഡുമായി നേരിട്ടെത്തി ബന്ധപ്പെട്ട കേന്ദ്രങ്ങളില്‍ നിന്നും ടി.സിയും കോണ്‍ഡക്ട് സര്‍ട്ടിഫിക്കറ്റും കൈപ്പറ്റണം.Dt.6.4.2018.
************************
സെന്റര്‍ ഫോര്‍ കണ്ടിന്യൂയിംഗ് എജ്യുക്കേഷന്‍ കേരളയുടെ കീഴില്‍ പ്ലാമൂട്, ചാരാച്ചിറയില്‍ പ്രവര്‍ത്തിക്കുന്ന കേരള സ്റ്റേറ്റ് സിവില്‍ സര്‍വീസ് അക്കാഡമിയിലും പാലക്കാട് സബ് സെന്ററിലും നാഷണല്‍ ടാലന്റ് സെര്‍ച്ച് പരീക്ഷയുടെ പ്രിലിമിനറി കോച്ചിംഗ് ഏപ്രില്‍ എട്ടിന് ആരംഭിക്കും. പത്താം ക്ലാസ് വിദ്യാര്‍ത്ഥികള്‍ക്കാണ് പ്രവേശനം. നവംബര്‍ 2018 വരെയാണ് കോഴ്‌സിന്റെ കാലാവധി. ഞായറാഴ്ചകളിലും രണ്ടാം ശനിയാഴ്ചകളിലുമാണ് ക്ലാസ്. 5000 രൂപയും 18% ജി.എസ്.ടി ഉള്‍പ്പെടെ 5900 രൂപയാണ് ഫീസ്. എന്‍.ടി.എസ്.ഇയുടെ പ്രിലിമിനറി പരീക്ഷ പാസായവര്‍ക്കുളള മെയിന്‍ പരീക്ഷയുടെ പരിശീലനവും എട്ടിന് തുടങ്ങും. മെയിന്‍ പരീക്ഷാ പരിശീലനത്തിന് ഫീസ് ഈടാക്കുകയില്ല. വിലാസം: ഡയറക്ടര്‍, സെന്റര്‍ ഫോര്‍ കണ്ടിന്യൂയിംഗ് എജ്യൂക്കേഷന്‍ കേരള, ആനത്തറ ലെയിന്‍ ചാരാച്ചിറ, കവടിയാര്‍, പി.ഒ, തിരുവനന്തപുരം. വെബ്‌സൈറ്റ്:www.ccek.org, www.kscsa.org ഫോണ്‍: 0471 2313065, 2311654.Dt.4.4.2018.
************************
പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി 45000 ക്ലാസ് മുറികള്‍ ഹൈടെക് ആകുന്ന പശ്ചാത്തലത്തില്‍ ജൂണ്‍ മാസത്തോടെ ഒരു ലക്ഷം അദ്ധ്യാപകര്‍ക്കും അരലക്ഷം ലിറ്റില്‍ കൈറ്റ്‌സ് ക്ലബ്ബിലെ കുട്ടികള്‍ക്കും പ്രത്യേക ഐ.ടി. പരിശീലനങ്ങള്‍ നല്‍കുന്നതിനുള്ള വിശദാംശങ്ങള്‍ കേരള ഇന്‍ഫ്രാസ്ട്രക്ചര്‍ ആന്റ് ടെക്‌നോളജി ഫോര്‍ എഡ്യൂക്കേഷന്‍ (കൈറ്റ്) പ്രസിദ്ധീകരിച്ചു. ഹൈസ്‌ക്കൂള്‍ ക്ലാസുകളില്‍ പഠിപ്പിക്കുന്ന 56000ത്തോളം അദ്ധ്യാപകര്‍ക്ക് നല്‍കുന്ന നാലു ദിവസത്തെ പരിശീലനം ഏപ്രില്‍ 21 ന് ആരംഭിക്കും. മലയാളം, ഇംഗ്ലീഷ്, ഹിന്ദി, ഗണിതം, ഫിസിക്കല്‍ സയന്‍സ്, ബയോളജി, സോഷ്യല്‍ സയന്‍സ്, അറബിക്, സംസ്‌കൃതം, ഉറുദു, തമിഴ്, കന്നട, കലാകായികതൊഴില്‍ പരിചയം എന്നിങ്ങനെ പതിമൂന്ന് മേഖലകളിലും പ്രത്യേകമായാണ് പരിശീലനങ്ങള്‍ നല്‍കുന്നത്. 28000ത്തോളം വരുന്ന ഹയര്‍സെക്കന്ററി-വൊക്കേഷണല്‍ ഹയര്‍ സെക്കന്ററി അദ്ധ്യാപകര്‍ക്കുള്ള നാല് ദിന പരിശീലനം മെയ് 7 മുതല്‍ ആരംഭിക്കും. ഫിസിക്‌സ്, ബോട്ടണി, സുവോളജി, കെമിസ്ട്രി, കമ്പ്യൂട്ടര്‍ ആപ്ലിക്കേഷന്‍, ഗണിതം, ജിയോഗ്രഫി, ഹിസ്റ്ററി, പൊളിറ്റിക്കല്‍ സയന്‍സ്, ഇക്കണോമിക്‌സ്, കൊമേഴ്‌സ്, മലയാളം, ഇംഗ്ലീഷ്, ഹിന്ദി എന്നിങ്ങനെ പതിനാല് മേഖലകളിലാണ് വ്യത്യസ്ത പരിശീലനങ്ങള്‍. ഹൈടെക് ക്ലാസ്‌റൂം വിനിമയം നടത്തുന്നതിന് എല്ലാ അദ്ധ്യാപകരേയും അവരുടെ വിഷയങ്ങളില്‍ പ്രാപ്തരാക്കുന്ന തരത്തിലാണ് പരിശീലനത്തിന്റെ ഉള്ളടക്കം. ലിറ്റില്‍ കൈറ്റ്‌സ് ഐ.ടി. ക്ലബ്ബുകളുടെ ചുമതലയുള്ള അദ്ധ്യാപകരായ 3980 'കൈറ്റ് മാസ്റ്റേഴ്‌സി'ന് രണ്ടു ദിവസത്തെ പരിശീലനം ഏപ്രില്‍ 3, 4 തീയതികളില്‍ നല്‍കും. ലിറ്റില്‍ കൈറ്റ്‌സ് ക്ലബ്ബിലെ 50000 കുട്ടികള്‍ക്കുള്ള ദ്വിദിന പരിശീലനം മെയ് 21 മുതല്‍ ആരംഭിക്കും. പ്രൈമറി-അപ്പര്‍ പ്രൈമറി സ്‌കൂളുകളിലെ 9000 സ്‌കൂള്‍ ഐ.ടി. കോ-ഓര്‍ഡിനേറ്റര്‍മാര്‍ക്ക് ഏപ്രില്‍ 12 മുതല്‍ 20 വരെയുള്ള കാലയളവില്‍ രണ്ടു ബാച്ചുകളിലായി നാല് ദിവസത്തെ ഐ.ടി. പരിശീലനം നല്‍കും. പരിശീലനങ്ങളില്‍ പങ്കെടുക്കുന്ന ഹൈസ്‌ക്കൂള്‍ അദ്ധ്യാപകര്‍ക്ക് താല്പര്യമുള്ള കേന്ദ്രവും, ബാച്ചും തെരഞ്ഞെടുക്കാനുള്ള ഓണ്‍ലൈന്‍ സംവിധാനം കൈറ്റ് വെബ്‌സൈറ്റിലെ 'ട്രെയിനിംഗ് മാനേജ്‌മെന്റ്' വിഭാഗത്തില്‍ ഇന്ന് മുതല്‍ ലഭ്യമാണെന്ന് കൈറ്റ് വൈസ് ചെയര്‍മാന്‍ കെ.അന്‍വര്‍ സാദത്ത് അറിയിച്ചു. ആദ്യമായി ഏര്‍പ്പെടുത്തുന്ന ഈ സംവിധാനം വഴി അദ്ധ്യാപകര്‍ക്ക് ഏത് ജില്ലയിലും പരിശീലനത്തില്‍ പങ്കെടുക്കാം. ഓരോ ബാച്ചിലേയും നിശ്ചിത എണ്ണത്തില്‍ ആദ്യം രജിസ്റ്റര്‍ ചെയ്യുന്നവര്‍ക്ക് അവസരം നല്‍കും. ഇപ്രാവശ്യം പരിശീലനത്തിന് ആദ്യമായി ഒരു പരിശീലനാര്‍ത്ഥിക്ക് ഒരു കമ്പ്യൂട്ടര്‍ എന്ന നിലയിലാണ് ക്രമീകരിച്ചിരിക്കുന്നത്. വിവിധ ജില്ലകളിലെ 656 പരിശീലന കേന്ദ്രങ്ങളിലായി 16400 പേര്‍ക്ക് ഒരേ സമയം പരിശീലനം നല്‍കാനുള്ള ലാപ്ടോപ്പുകള്‍, ബ്രോഡ്ബാന്‍ഡ് ഇന്റര്‍നെറ്റ് ഉള്‍പ്പെടെയുള്ള മുഴുവന്‍ സംവിധാനങ്ങളും കൈറ്റ് ഏര്‍പ്പെടുത്തി. സര്‍ക്കുലറുകള്‍ www.kite.kerala.gov.in ല്‍ ലഭ്യമാണ്.Dt.21.3.2018.
************************
2017 നവംബര്‍ മാസം നടന്ന ഡി.എഡ് ഒന്ന്, മൂന്ന് സെമസ്റ്റര്‍ പരീക്ഷകളുടെ ഫലം പ്രസിദ്ധീകരിച്ചു. ഒന്നാം സെമസ്റ്ററില്‍ 62.74 ശതമാനവും മൂന്നാം സെമസ്റ്ററില്‍ 90.25 ശതമാനവുമാണ് വിജയം. വെബ്‌സൈറ്റ്:www.keralapareekshabhavan.in.Dt.21.3.2018.
************************
സംസ്ഥാന വിദ്യാഭ്യാസ വകുപ്പിന്റെയും എസ്.സി.ഇ.ആര്‍.ടി യുടെയും നേതൃത്വത്തില്‍ സ്‌കൂള്‍ കുട്ടികളുടെ ഗണിതശാസ്ത്രത്തിലുള്ള കഴിവുകള്‍ പരിപോഷിപ്പിക്കുന്നതിനുള്ള പദ്ധതിയായ ന്യൂമാറ്റ്‌സിന്റെ സംസ്ഥാനതല അഭിരുചി പരീക്ഷാഫലം പ്രസിദ്ധീകരിച്ചു. പരീക്ഷാഫലം www.scert.kerala.gov.in എന്ന വെബ്‌സൈറ്റില്‍ ലഭ്യമാണ്.Dt.12.3.2018.
************************
2018 മാര്‍ച്ച് എസ്.എസ്.എല്‍.സി പരീക്ഷയുടെ മൂല്യനിര്‍ണ്ണയം നടത്തുന്നതിന് അഡീഷണല്‍ ചീഫ് എക്‌സാമിനേഴ്‌സ്, അസിസ്റ്റന്റ് എക്‌സാമിനേഴ്‌സ് ആയി അതത് സോണുകളില്‍ അപേക്ഷിക്കുന്നതിന് മാര്‍ച്ച് 12 വരെ സൗകര്യം ഉണ്ടായിരിക്കും. പ്രഥമാധ്യാപകര്‍ തങ്ങളുടെ സ്‌കൂളിലെ എല്ലാ അദ്ധ്യാപകരും മൂല്യ നിര്‍ണ്ണയത്തിന് അപേക്ഷിച്ചിട്ടുണ്ടെന്ന് ഉറപ്പുവരുത്തണം. പ്രഥമാദ്ധ്യാപകര്‍ iExams HM login വഴി 12 ന് മുമ്പായി അപേക്ഷകരുടെ വിവരങ്ങള്‍ ഓണ്‍ലൈനായി സമര്‍പ്പിക്കണം.Dt.9.3.2018.
************************
പരീക്ഷാഭവന്‍ 2017 ജൂണ്‍മാസം നടത്തിയ ഡി.എല്‍.ഇ.ഡി. (ഹിന്ദി) പരീക്ഷയുടെ പുനര്‍ മൂല്യനിര്‍ണ്ണയഫലം പ്രസിദ്ധീകരിച്ചു. പരീക്ഷാഭവന്റെ വെബ്‌സൈറ്റില്‍ (www.keralapareekshabhavan.in) ഫലം ലഭ്യമാണ്.Dt.9.3.2018.
************************
സംസ്ഥാനത്ത് മറ്റു പിന്നാക്ക വിഭാഗങ്ങളില്‍പ്പെട്ടവരില്‍ വിദ്യാഭ്യാസ പ്രവേശനത്തിനും ഉദ്യോഗ നിയമനത്തിനുമായി നോണ്‍ ക്രീമിലെയര്‍ സര്‍ട്ടിഫിക്കറ്റിന് അപേക്ഷിക്കുമ്പോള്‍ ഇതിനുള്ള മാനദണ്ഡങ്ങള്‍ ഈ സര്‍ട്ടിഫിക്കറ്റിന് അര്‍ഹരാണോ എന്ന് വ്യക്തമായി മനസ്സിലാക്കിയിരിക്കണമെന്ന് ലാന്റ് റവന്യൂ കമ്മീഷണറേറ്റിലെ പബ്ലിക് റിലേഷന്‍സ് വിഭാഗം അറിയിച്ചു. ഭരണഘടന പദവിയിലുള്ളവര്‍, യു.എന്‍., യുനസ്‌കോ, ലോക ബാങ്ക് തുടങ്ങിയ അന്തര്‍ദേശീയ സ്ഥാപനങ്ങളില്‍ ജോലി ചെയ്യുന്നവര്‍, സര്‍ക്കാര്‍/അര്‍ധസര്‍ക്കാര്‍ സേവനങ്ങളില്‍ മാതാപിതാക്കള്‍ രണ്ടുപേരും ഗസറ്റഡ് തസ്തികയില്‍ പ്രവേശിച്ചവര്‍, മാതാപിതാക്കളില്‍ ഒരാള്‍ ക്ലാസ് വണ്‍ ആയി പ്രവേശിച്ചവര്‍ (സംസ്ഥാന സര്‍വ്വീസില്‍ 36 വയസ്സിനു മുമ്പും കേന്ദ്ര സര്‍വീസില്‍ 40 വയസ്സിനു മുമ്പും ഈ തസ്തികകളില്‍ പ്രവേശിച്ചവരായിരിക്കണം), സായുധ സേനയില്‍ കേണല്‍ പദവി#ില്‍ കുറയാത്ത പദവി വഹിക്കുന്നവര്‍, ഭൂവുടമകള്‍/അഞ്ച് ഹെക്ടറില്‍ കുറയാത്ത ജലസേചനമുള്ള ഭൂമിയുള്ളവര്‍/പ്ലാന്റേഷനുള്ളവര്‍ എന്നിവരെ ക്രീമിലെയര്‍ ആയി കണക്കാക്കി സംവരണത്തില്‍ നിന്ന് ഒഴിവാക്കിയിട്ടുണ്ട്. ഇവര്‍ നോണ്‍ ക്രീമിലെയര്‍ സര്‍ട്ടിഫിക്കറ്റിന് അര്‍ഹരല്ല. വരുമാനം കണക്കാക്കുമ്പോള്‍ കഴിഞ്ഞ സാമ്പത്തിക വര്‍ഷത്തില്‍ ആറുലക്ഷം രൂപയിലധികം വരുമാനമുള്ളവര്‍ (കേന്ദ്ര ആവശ്യങ്ങള്‍ക്ക് ഇത് എട്ടു ലക്ഷം) വരുമാനം കണക്കു കൂട്ടുന്നതില്‍ ശമ്പളവും കാര്‍ഷിക വരുമാനവും പരിഗണിക്കാന്‍ പാടില്ല. ഉദ്യോഗസ്ഥരെ സംബന്ധിച്ച് അവര്‍ ഏതു ക്ലാസില്‍ സര്‍വീസില്‍ പ്രവേശിച്ചു എന്നതാണ് ക്രീമിലെയര്‍ ആയി കണക്കാക്കുന്നതിനുള്ള മാനദണ്ഡം. നോണ്‍ ക്രീമിലെയര്‍ സര്‍ട്ടിഫിക്കറ്റിനുള്ള അപേക്ഷ നല്‍കുന്നതിനു മുമ്പ് അപേക്ഷകര്‍ ഇക്കാര്യങ്ങള്‍ വ്യക്തമായി മനസ്സിലാക്കിയിരിക്കണം. ഇതു സംബന്ധിച്ച മാനദണ്ഡങ്ങളുടെയും മാര്‍ഗനിര്‍ദേശങ്ങളുടെയും അടിസ്ഥാനത്തിലായിരിക്കണം റവന്യൂ ഉദ്യോഗസ്ഥര്‍ അപേക്ഷയില്‍ തീര്‍പ്പു കല്‍പ്പിക്കേണ്ടത്. ഇക്കാര്യത്തില്‍ പിന്നാക്ക വിഭാഗ വികസന വകുപ്പ് ഡയറക്ടറേറ്റില്‍ പ്രവര്‍ത്തിക്കുന്ന ഹെല്‍പ്പ് ഡെസ്‌ക്കിലെ 0471 - 2727379, 9961288520 എന്നീ നമ്പരുകളില്‍ വിളിച്ച് സംശയ നിവാരണം വരുത്തണമെന്ന് ലാന്റ് റവന്യൂ കമ്മീഷണറേറ്റിലെ പബ്ലിക് റിലേഷന്‍സ് വിഭാഗം അറിയിച്ചു.Dt.5.3.2018.
************************
2017 ഡിസംബറില്‍ നടത്തിയ കെ-ടെറ്റ് പരീക്ഷയുടെ ഫലം പ്രസിദ്ധപ്പെടുത്തി. പരീക്ഷാഭവന്‍ വെബ്‌സൈറ്റിലും, www.ktet.kerala.gov.in എന്ന വെബ്‌പോര്‍ട്ടലിലും ഫലം ലഭ്യമാണ്. നാലു കാറ്റഗറികളിലായി 82708 പേര്‍ പരീക്ഷ എഴുതിയതില്‍ 22,448 പേര്‍ കെ-ടെറ്റ് യോഗ്യതാ പരീക്ഷ വിജയിച്ചു. കാറ്റഗറി ഒന്നില്‍ 4921, കാറ്റഗറി രണ്ടില്‍ 10105, കാറ്റഗറി മൂന്നില്‍ 5179, കാറ്റഗറി നാലില്‍ 2243 പേരും വിജയിച്ചു. ശ്രീവിദ്യ കെ, ആകാശ് എസ്.കെ എന്നിവര്‍ കാറ്റഗറി ഒന്നിലും, ശില്‍പ കെ, വിദ്യാശ്രീ പി.കെ എന്നിവര്‍ കാറ്റഗറി രണ്ടിലും, ശ്രീലക്ഷ്മി എം.എസ്, ജോയിസ് പോള്‍ എന്നിവര്‍ കാറ്റഗറി മൂന്നിലും രോഹിണി സി.പി, മുഹമ്മദ്ഷാ ഐ. എന്നിവര്‍ കാറ്റഗറി നാലിലും 80 ശതമാനം മാര്‍ക്ക് നേടി ക്യാഷ് അവാര്‍ഡിന് അര്‍ഹരായി. വിജയിച്ചവര്‍ വിജ്ഞാപനത്തില്‍ നിഷ്‌ക്കര്‍ഷിച്ചയോഗ്യത തെളിയിക്കുന്നതിന് അസല്‍ സര്‍ട്ടിഫിക്കറ്റുകളുടെ പരിശോധനയ്ക്ക് അവരവരുടെ പരീക്ഷാ കേന്ദ്രം സ്ഥിതിചെയ്യുന്നിടത്തെ സ്ഥലത്തെ ജില്ലാ വിദ്യാഭ്യാസ ഓഫീസില്‍ ഏപ്രില്‍ ഒന്നു മുതല്‍ ഹാജരാകണം. Dt.5.3.2018.
************************
പൊതുവിദ്യാലയങ്ങളിലെ വിവിധ മേഖലകളിലെ മികവുകള്‍ അവതരിപ്പിക്കാനായി കേരള ഇന്‍ഫ്രാസ്ട്രക്ചര്‍ ആന്റ് ടെക്‌നോളജി ഫോര്‍ എഡ്യൂക്കേഷന്‍ (കൈറ്റ്) സംഘടിപ്പിക്കുന്ന ഹരിത വിദ്യാലയം വിദ്യാഭ്യാസ റിയാലിറ്റി ഷോയുടെ ഗ്രാന്‍ഡ് ഫിനാലെ ഇന്ന് (മാര്‍ച്ച് അഞ്ച്) വൈകിട്ട് ആറു മണിക്ക് തിരുവനന്തപുരം നിശാഗന്ധി ഓഡിറ്റോറിയത്തില്‍ മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. 2017 ഡിസംബര്‍ നാല് മുതല്‍ കൈറ്റ് വിക്ടേഴ്‌സിലും ദൂരദര്‍ശനിലും സംപ്രേഷണം ചെയ്തു വരുന്ന 'ഹരിതവിദ്യാലയം' അറുപത് എപ്പിസോഡുകള്‍ പിന്നിട്ടു. തെരഞ്ഞെടുത്ത 100 സ്‌കൂളുകളാണ് ആദ്യ റൗണ്ടില്‍ ഷോയില്‍ മാറ്റുരച്ചത്. ജി.എല്‍.പി.എസ്. ആനാട്, ജി.എച്ച്.എസ്. അവനവഞ്ചേരി, ജി.ജി.എച്ച്.എസ്.എസ്. കോട്ടണ്‍ഹില്‍ (തിരുവനന്തപുരം), ഐ.ഐ.എ.എല്‍.പി.എസ്. ചന്ദേര, എ.യു.പി.എസ്. ഉദിനൂര്‍, ജി.എച്ച്.എസ്.എസ്. ഉദിനൂര്‍ (കാസര്‍ഗോഡ്), ജി.യു.പി.എസ്. പുതിയങ്കം, ജി.യു.പി.എസ്. ഭീമനാട്, ജി.യു.പി.എസ്. കോങ്ങാട് (പാലക്കാട്), ജി.എച്ച്.എസ്.എസ്. കടയ്ക്കല്‍ (കൊല്ലം), എം.ഐ.എച്ച്.എസ്. പൂങ്കാവ് (ആലപ്പുഴ), പി.പി.എം.എച്ച്.എസ്.എസ്. കൊട്ടൂക്കര (മലപ്പുറം), എസ്.എന്‍.ഡി.പി.എച്ച്.എസ്.എസ്. ഉദയംപേരൂര്‍ (എറണാകുളം) എന്നീ സ്‌കൂളുകളാണ് അവസാന റൗണ്ടില്‍ മത്സരിച്ചത്. www.victers.itschool.gov.in സൈറ്റില്‍ തത്സമയവും youtube.com/itsvicters ല്‍ പിന്നീടും എപ്പിസോഡുകള്‍ കാണാം. അവസാന റൗണ്ടിലെത്തിയ മറ്റു പത്തു സ്‌കൂളുകള്‍ക്കും ഒന്നര ലക്ഷം വീതവും ലഭിക്കും. ഇതിനുപുറമെ ഈ വര്‍ഷത്തെ സംസ്ഥാന ബജറ്റില്‍ ഹരിതവിദ്യാലയം റിയാലിറ്റി ഷോയില്‍ പങ്കെടുത്ത സ്‌കൂളുകള്‍ക്ക് അടിസ്ഥാനസൗകര്യ വികസനത്തിനായി സ്‌കൂളൊന്നിന് 50 ലക്ഷം മുതല്‍ ഒരു കോടി വരെ ധനവകുപ്പു മന്ത്രി പ്രഖ്യാപിച്ചിട്ടുണ്ട്.Dt.4.3.2018.
************************
പൊതുവിദ്യാഭ്യാസ സംരക്ഷണയജ്ഞത്തിന്റെ ഭാഗമായി 45000 ക്ലാസ്മുറികള്‍ ഹൈടെക്കാക്കുന്നതിന്റെ ഭാഗമായി 22402 ക്ലാസ്മുറികള്‍ ഹൈടെക് ആക്കുന്ന നടപടിക്രമങ്ങള്‍ കൈറ്റ് (കേരള ഇന്‍ഫ്രാസ്ട്രക്ചര്‍ & ടെക്‌നോളജി ഫോര്‍ എഡ്യൂക്കേഷന്‍) പൂര്‍ത്തിയാക്കിയതായി എക്‌സിക്യൂട്ടീവ് ഡയറക്ടര്‍ അറിയിച്ചു. 2018 ജനുവരി 22-നാണ് മുഖ്യമന്ത്രി പിണറായി വിജയന്‍ ഹൈടെക് പ്രോഗ്രാം ഉദ്ഘാടനം ചെയ്തത്. 1564 സ്‌കൂളുകളില്‍ മുഴുവന്‍ ക്ലാസ്മുറികളിലും 1079 സ്‌കൂളുകളില്‍ പകുതിയിലധികം ക്ലാസ്മുറികളിലും ഹൈടെക് സംവിധാനമെത്തി. ഓരോ ക്ലാസ്മുറികളിലേക്കും ലാപ്ടോപ്പുകള്‍, മള്‍ട്ടിമീഡിയ പ്രൊജക്ടറുകള്‍, മൗണ്ടിംഗ് കിറ്റുകള്‍, സ്‌ക്രീനുകള്‍ തുടങ്ങിയവ ലഭ്യമാക്കിയിട്ടുണ്ട്. ഇന്‍സ്റ്റലേഷന്‍ പ്രവര്‍ത്തനങ്ങള്‍ക്ക് ക്ലാസ്മുറിയൊന്നിന് 1000/ രൂപ വീതവും, സ്‌ക്രീനിന് പകരം ഭിത്തി പെയിന്റ് ചെയ്യുന്നതിന് 1500/ രൂപ വീതവും സ്‌കൂളുകള്‍ക്ക് അനുവദിക്കും. കൈറ്റിന്റെ ജില്ലാ കേന്ദ്രങ്ങള്‍ വഴി പ്രത്യേക ഓണ്‍ലൈന്‍ മോണിറ്ററിംഗ് സംവിധാനം ഉപയോഗിച്ചാണ് വിതരണം നടന്നത്. സ്‌കൂളുകളില്‍ ഹൈടെക് സംവിധാനമൊരുക്കാന്‍ സജ്ജമായ ക്ലാസ്മുറികളിലേക്കാണ് ഉപകരണങ്ങള്‍ വിതരണം ചെയ്തത്. 139 സ്‌കൂളുകളിലെ 1264 ക്ലാസ്മുറികളില്‍ കഴിഞ്ഞ വര്‍ഷം തന്നെ പൈലറ്റടിസ്ഥാനത്തില്‍ ഹൈടെക് ക്ലാസ്മുറികള്‍ സജ്ജമാക്കിയിരുന്നു. ഇതുള്‍പ്പെടെ ഒന്നാംഘട്ടത്തില്‍ ഏറ്റവും കൂടുതല്‍ ക്ലാസ്മുറികള്‍ ഹൈടെക്കായ (2819 ക്ലാസ്മുറികള്‍) ജില്ല മലപ്പുറമാണ്. കോഴിക്കോടും (2502) എറണാകുളവുമാണ് (2085) തൊട്ടടുത്ത്. രണ്ടാം ഘട്ടത്തില്‍ അടുത്ത 11000 ക്ലാസ്മുറികളിലേക്കുള്ള വിതരണവും ഈ മാസത്തില്‍ത്തന്നെ പൂര്‍ത്തിയാക്കുമെന്ന് കൈറ്റ് വൈസ് ചെയര്‍മാന്‍ കെ. അന്‍വര്‍ സാദത്ത് അറിയിച്ചു. ഇതോടെ 33000 ക്ലാസ്മുറികള്‍ ഹൈടെക്കാക്കുന്ന പ്രക്രിയ മാര്‍ച്ചോടെ പൂര്‍ത്തിയാകും. ക്ലാസ്മുറികള്‍ സജ്ജമാക്കാന്‍ സമയം ആവശ്യപ്പെട്ടിട്ടുള്ള അവശേഷിക്കുന്ന സ്‌കൂളുകളിലെ ക്ലാസ്മുറികള്‍ കൂടി മെയ് മാസത്തോടെ ഹൈടെക്കാക്കും. അടുത്ത അദ്ധ്യനവര്‍ഷം തുടങ്ങുന്നതിന് മുമ്പ് സംസ്ഥാനത്തെ എട്ട് മുതല്‍ 12 വരെ ക്ലാസുകളുളള സര്‍ക്കാര്‍, എയിഡഡ് മേഖലകളിലുള്ള എല്ലാ ഹൈസ്‌കൂള്‍-ഹയര്‍സെക്കന്ററി- വൊക്കേഷണല്‍ ഹയര്‍സെക്കന്ററി സ്‌കൂളുകളിലേയും ക്ലാസ്മുറികള്‍ ഹൈടെക്കാകും. ഹൈടെക് ക്ലാസ്മുറികളില്‍ പ്രയോജനപ്പെടുത്തുന്നതിനുള്ള 'സമഗ്ര' റിസോഴ്‌സ് പോര്‍ട്ടല്‍ തയ്യാറായിക്കഴിഞ്ഞു. ബ്രോഡ്ബാന്‍ഡ് ഇന്റര്‍നെറ്റ് എല്ലാ സ്‌കൂളുകള്‍ക്കും ലഭ്യമാക്കി. സമഗ്ര ഉപയോഗിച്ച് ഹൈടെക് ക്ലാസ്മുറികളില്‍ പഠിപ്പിക്കുന്നതിനുള്ള പ്രത്യേക പരിശീലനം ഈ അവധിക്കാലത്ത് മുഴുവന്‍ അദ്ധ്യാപകര്‍ക്കും നല്‍കാന്‍ പൊതുവിദ്യാഭ്യാസ വകുപ്പ് തീരുമാനിച്ചിട്ടുണ്ട്. സെക്കന്ററിതലത്തില്‍ നടപ്പാക്കുന്ന ഹൈടെക് സ്‌കൂള്‍ സ്‌കീമിന്റെ തുടര്‍ച്ചയായി ഒന്നു മുതല്‍ ഏഴ് വരെ ക്ലാസുകളിലുള്ള 11000 ലധികം പ്രൈമറി-അപ്പര്‍ പ്രൈമറി സ്‌കൂളുകളില്‍ ഹൈടെക് ലാബ് സംവിധാനം ഒരുക്കാനായി 300 കോടി രൂപ സംസ്ഥാന സര്‍ക്കാര്‍ ബഡ്ജറ്റില്‍ ഉള്‍പ്പെടുത്തിയിട്ടുണ്ടെന്നും എക്‌സിക്യൂട്ടീവ് ഡയറക്ടര്‍ അറിയിച്ചു. Dt.4.3.2018.
************************
ഹയര്‍സെക്കണ്ടറി പരീക്ഷയുമായി ബന്ധപ്പെട്ട് കുട്ടികള്‍ അനുഭവിക്കുന്ന വിവിധ തരം സമ്മര്‍ദ്ദങ്ങള്‍ ലഘൂകരിക്കുന്നതിനായി വിദ്യാര്‍ത്ഥികള്‍ക്കും രക്ഷാകര്‍ത്താക്കള്‍ക്കും ആവശ്യമായ പിന്തുണ നല്‍കുന്നതിന് ഹയര്‍സെക്കണ്ടറി വിദ്യാഭ്യാസവകുപ്പ് വീ ഹെല്‍പ്പ് എന്ന പേരില്‍ ടോള്‍ഫ്രീ ടെലിഫോണ്‍ സഹായകേന്ദ്രം ആരംഭിച്ചു. വിദ്യാര്‍ത്ഥികള്‍ക്കും രക്ഷാകര്‍ത്താക്കള്‍ക്കും രാവിലെ ഏഴു മുതല്‍ വൈകിട്ട് ഏഴു വരെ ഫോണില്‍ കൗണ്‍സലിംഗ് സഹായം ലഭ്യമാകും. കുട്ടികള്‍ക്കും രക്ഷാകര്‍ത്താക്കള്‍ക്കും സൗജന്യമായി 1800 425 2585 എന്ന നമ്പറില്‍ വിളിക്കാം. ടോള്‍ ഫ്രീ സേവനം മാര്‍ച്ച് അഞ്ച് മുതല്‍ പരീക്ഷ അവസാനിക്കുന്നതുവരെ എല്ലാ പ്രവൃത്തിദിനങ്ങളിലും ലഭ്യമാണ്. സെന്ററുകളില്‍ പരിശീലനം ലഭിച്ച അധ്യാപകരുടെ കൗണ്‍സലിംഗ് സേവനം ഉറപ്പാക്കിയിട്ടുണ്ട്. ഹയര്‍ സെക്കണ്ടറി കരിയര്‍ ഗൈഡന്‍സ് & അഡോളസെന്റ് കൗണ്‍സലിംഗ് സെല്ലിന്റെ നേതൃത്വത്തിലാണ് വീ ഹെല്‍പ്പ് സംഘടിപ്പിക്കുന്നത്.Dt.3.3.2018.
************************
സ്‌കൂള്‍ ഉച്ചഭക്ഷണ പദ്ധതിയുടെ പരിധിയില്‍ വരുന്ന മുഴുവന്‍ കുട്ടികള്‍ക്കും, ഓണം-ക്രിസ്തുമസ് അവധിക്കു മുന്നോടിയായി അരി വിതരണം ചെയ്തിരുന്നതു പോലെ, 2017-18 അദ്ധ്യയന വര്‍ഷത്തിലെ മധ്യവേനല്‍ അവധിക്കാലം ആരംഭിക്കുന്നതിനു മുമ്പായി ഓരോ കുട്ടിക്കും 4 കിലോ അരി വീതം വിതരണം ചെയ്യുന്നതിന് സര്‍ക്കാര്‍ ഉത്തരവായി.Dt.2.3.2018.
************************
കൈറ്റ് വിക്‌ടേഴ്‌സ് ചാനലില്‍ ഇന്ന് (മാര്‍ച്ച് 3) രാത്രി 9.15 ന് കേതന്‍ മേത്ത സംവിധാനം ചെയ്ത് 1987 ല്‍ പുറത്തിറങ്ങി രാംഗോപാല്‍ ബജാജ്, നൈന കുല്‍ക്കര്‍ണി, സുരേഷ് ഒബ്‌റോയ് എന്നിവര്‍ അഭിനയിച്ച എന്‍.എഫ്.ഡി.സി. യുടെ ഹിന്ദി ചലച്ചിത്രം 'മിര്‍ച്ച് മസാല' സംപ്രേഷണം ചെയ്യുന്നു. ഞായറാഴ്ച (മാര്‍ച്ച് 4) രാവിലെ 9.15 ന് എം.എസ് സത്യു സംവിധാനം ചെയ്ത തെലുങ്ക് ചലച്ചിത്രം 'ഗലിഗേ'യും സംപ്രേഷണം ചെയ്യും.Dt.2.3.2018.
************************
ദേശീയ സ്‌കൂള്‍ കായികമത്സരങ്ങളില്‍ കേരളത്തെ പ്രതിനിധീകരിച്ച് 2012-13, 2013-14, 2014-15, 2015-16 വര്‍ഷങ്ങളില്‍ ഒന്ന്, രണ്ട്, മൂന്ന് സ്ഥാനങ്ങള്‍ നേടിയ കായിക താരങ്ങള്‍ക്ക് കാഷ് അവാര്‍ഡ് തുക യഥാക്രമം 25000, 20000, 15000 രൂപയും പരിശീലകര്‍ക്ക് 5000 രൂപയും നല്‍കാന്‍ സര്‍ക്കാര്‍ തുക അനുവദിച്ച് ഉത്തരവായി. അര്‍ഹരായ കായികതാരങ്ങളുടെ ലിസ്റ്റും അപേക്ഷാഫോറവും ഇത് സംബന്ധിച്ച സര്‍ക്കുലറും www.education.kerala.gov.in എന്ന വെബ്‌സൈറ്റില്‍ പ്രസിദ്ധീകരിച്ചിട്ടുണ്ട്. അപേക്ഷ മാര്‍ച്ച് ഏഴിന് മുമ്പായി supdsports@gmail.com എന്ന ഇ-മെയില്‍ വിലാസത്തില്‍ ലഭ്യമാക്കണം.Dt.1.3.2018.
************************
സംസ്ഥാനത്തെ മത ന്യൂനപക്ഷ വിദ്യാഭ്യാസ പ്രവര്‍ത്തനങ്ങള്‍ വിലയിരുത്താനും, ന്യൂനപക്ഷ സ്ഥാപനങ്ങള്‍ സന്ദര്‍ശിക്കാനും, ന്യൂനപക്ഷ വിദ്യാഭ്യാസ സെമിനാറില്‍ പങ്കെടുക്കാനുമായി ദേശീയ ന്യൂനപക്ഷ കമ്മീഷന്‍ അംഗങ്ങളായ നഹീദ് ആബിദി, ഡോ. ബാല്‍ തെജ് സിംഗ് മന്‍, സെക്രട്ടറി സരോജ് പുല്‍ഹാനി, ഡെപ്യൂട്ടി സെക്രട്ടറി സന്ദീപ് ജൈന്‍ എന്നിവര്‍ മാര്‍ച്ച് ഏഴിന് കേരളത്തിലെത്തും. 11 വരെ വിവിധ പരിപാടികളില്‍ ഇവര്‍ പങ്കെടുക്കും. തിരുവനന്തപുരത്താണ് വിദ്യാഭ്യാസ സെമിനാര്‍ സംഘടിപ്പിച്ചിരിക്കുന്നത്. ന്യൂനപക്ഷ വിദ്യാഭ്യാസം, ന്യൂനപക്ഷങ്ങളുടെ ഭരണഘടനാ അവകാശങ്ങള്‍, ദേശീയ ന്യൂനപക്ഷ വിദ്യാഭ്യാസ കമ്മീഷന്റെ പ്രവര്‍ത്തനങ്ങള്‍, 2009 ലെ വിദ്യാഭ്യാസ അവകാശ നിയമവും ന്യൂനപക്ഷ വിദ്യാഭ്യാസ സ്ഥാപനങ്ങളും, ന്യൂനപക്ഷ അവകാശ ലംഘനങ്ങള്‍ എന്നിവയെക്കുറിച്ച് പ്രഭാഷണങ്ങളും ന്യൂനപക്ഷ വിദ്യാഭ്യാസ സ്ഥാപന അധികാരികളുമായും പ്രിന്‍സിപ്പള്‍മാരുമായുള്ള ചര്‍ച്ചയുമാണ് തിരുവനന്തപുരത്ത് നടത്തുന്നത്. എട്ടിന് തിരുവനന്തപുരം സെക്രട്ടേറിയറ്റ് അനക്‌സ് രണ്ടിലെ ലയം കോണ്‍ഫറന്‍സ് ഹാളില്‍ നടക്കുന്ന ദേശീയ സെമിനാറില്‍ തദ്ദേശ സ്വയംഭരണ മന്ത്രി ഡോ. കെ.ടി. ജലീല്‍, വിദ്യാഭ്യാസ മന്ത്രി പ്രൊഫ. സി. രവീന്ദ്രനാഥ്, സംസ്ഥാന ന്യൂനപക്ഷ കമ്മീഷന്‍ ചെയര്‍മാന്‍ പി.കെ. ഹനീഫ എന്നിവര്‍ പങ്കെടുക്കും. മാര്‍ച്ച് 10 ന് സെന്റ് തെരേസാസ് കോളേജ്, മാറംപള്ളി, എം.ഇ.എസ് കോളേജുകള്‍ എന്നിവിടങ്ങള്‍ കമ്മീഷന്‍ സന്ദര്‍ശിക്കും. നേരത്തെ പേര് രജിസ്റ്റര്‍ ചെയ്യുന്ന പ്രതിനിധികള്‍ക്കാണ് സെമിനാറില്‍ പങ്കെടുക്കാന്‍ അവസരം. രജിസ്റ്റര്‍ ചെയ്യേണ്ട ഫോണ്‍ നമ്പര്‍: 8089057008.Dt.1.3.2018.
************************
പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി സ്‌കൂളുകളില്‍ രൂപീകരിക്കുന്ന 'ലിറ്റില്‍ കൈറ്റ്‌സ് ' ഐടി ക്ലബുകള്‍ 1955 സ്‌കൂളുകളില്‍ തുടങ്ങാന്‍ കേരളാ ഇന്‍ഫ്രാസ്ട്രക്ചര്‍ ആന്റ് ടെക്‌നോളജി ഫോര്‍ എഡ്യൂക്കേഷന്‍ (കൈറ്റ്) അംഗീകാരം നല്‍കി. ഏറ്റവും കൂടുതല്‍ ക്ലബുകള്‍ എറണാകുളം ജില്ലയില്‍ (187 എണ്ണം) ആണ്. തിരുവനന്തപുരവും (183), കൊല്ലവും (173), മലപ്പുറവും (168) ആണ് കൂടുതല്‍ ക്ലബുകള്‍ ലഭിച്ച മറ്റു ജില്ലകള്‍. സ്‌കൂളുകളുടെ പട്ടിക www.kite.kerala.gov.in ല്‍ പ്രസിദ്ധീകരിച്ചിട്ടുണ്ട്. തെരഞ്ഞെടുത്ത സ്‌കൂളുകളില്‍ ഈ വര്‍ഷം എട്ടാം ക്ലാസില്‍ പഠിക്കുന്ന കുട്ടികള്‍ക്ക് മാര്‍ച്ച് 1 വരെ ക്ലബിലെ അംഗത്വത്തിന് അപേക്ഷ നല്‍കാം. മാര്‍ച്ച് മൂന്നിന് അഭിരുചി പരീക്ഷ നടത്തി തെരഞ്ഞെടുക്കുന്ന കുട്ടികളുടെ പട്ടിക മാര്‍ച്ച് 10 നകം പ്രസിദ്ധീകരിക്കും, ഏപ്രില്‍ മാസം ആദ്യ ക്യാമ്പ് നടത്തുമെന്ന് കൈറ്റ് വൈസ് ചെയര്‍മാന്‍ കെ. അന്‍വര്‍ സാദത്ത് അറിയിച്ചു. ഹാര്‍ ഡ്‌വെയര്‍ ഇലക്ട്രോണിക്‌സ്, അനിമേഷന്‍, സൈബര്‍ സുരക്ഷ, മലയാളം കമ്പ്യൂട്ടിംഗ്, മൊബൈല്‍ ആപ് നിര്‍മ്മാണം, പ്രോഗ്രാമിംഗ്, റോബോട്ടിക്‌സ്, ഇ-ഗവേണന്‍സ്, വെബ് ടിവി തുടങ്ങിയ മേഖലകളില്‍ കുട്ടികള്‍ക്ക് പ്രത്യേക വൈദഗ്ദ്ധ്യം നല്‍കുന്നതാണ് 'ലിറ്റില്‍ കൈറ്റ്‌സ് ' പദ്ധതി. സ്‌കൂളുകളിലെ ഹാര്‍ഡ്‌വെയര്‍ പരിപാലനം, രക്ഷാകര്‍ത്താക്കള്‍ക്കുള്ള കമ്പ്യൂട്ടര്‍ സാക്ഷരത, ഭിന്നശേഷിക്കാര്‍ക്കുള്ള പ്രത്യേക പരിശീലനം, പൊതുജനങ്ങള്‍ക്ക് സ്വതന്ത്ര സോഫ്ട്‌വെയര്‍ ഇന്‍സ്റ്റാള്‍ ചെയ്ത് നല്‍കല്‍, വിക്ടേഴ്‌സിലേക്കുള്ള ഉള്ളടക്ക നിര്‍മ്മാണം, സ്‌കൂള്‍തല വെബ് ടിവികള്‍ എന്നിങ്ങനെ വൈവിധ്യമാര്‍ന്ന പ്രവര്‍ത്തനങ്ങള്‍ ലിറ്റില്‍ കൈറ്റ്‌സ് ക്ലബുകള്‍ സംഘടിപ്പിക്കും. മികച്ച സ്‌കൂളുകള്‍ക്കും ക്ലബംഗങ്ങള്‍ക്കും അംഗീകാരങ്ങള്‍ നല്‍കും.Dt.1.3.2018.
************************
സംസ്ഥാന വികലാംഗക്ഷേമ കോര്‍പ്പറേഷന്‍ നടപ്പാക്കുന്ന, 40 ശതമാനത്തിനു മുകളില്‍ കാഴ്ച വെല്ലുവിളി നേരിടുന്ന പ്ലസ് ടു, ഡിഗ്രി, പി.ജി തുടങ്ങിയ കോഴ്‌സുകളും മറ്റ് സാങ്കേതിക വിദ്യാഭ്യാസം ഉള്‍പ്പെടെയുള്ള ഉന്നത തുടര്‍ വിദ്യാഭ്യാസ കോഴ്‌സുകളും പഠിക്കുന്ന വിദ്യാര്‍ത്ഥികള്‍ക്കുള്ള ലാപ്‌ടോപ്പ് വിതരണം ചെയ്യുന്ന പദ്ധതിയില്‍ അപേക്ഷ ക്ഷണിച്ചു. അപേക്ഷാഫോറം www.hpwc.kerala.gov.in എന്ന വിലാസത്തില്‍ ആപ്ലിക്കേഷന്‍ ഓഫ് ലാപ്‌ടോപ്പ് ഫോര്‍ വിഷ്വലി ഇംപേര്‍ഡ് എന്ന ലിങ്കില്‍ നിന്നും ഡൗണ്‍ലോഡ് ചെയ്യണം. ഫോറത്തില്‍ നിര്‍ദ്ദേശിച്ചിരിക്കുന്ന മാനദണ്ഡമനുസരിച്ച് പൂരിപ്പിച്ച് സൂചനയിലെ രേഖകള്‍ ഉള്‍പ്പെടുത്തി മാനേജിംഗ് ഡയറക്ടര്‍, കേരള സംസ്ഥാന വികലാംഗക്ഷേമ കോര്‍പ്പറേഷന്‍, പൂജപ്പുര, തിരുവനന്തപുരം - 695012 എന്ന വിലാസത്തില്‍ മാര്‍ച്ച് അഞ്ചിന് മുമ്പ് സമര്‍പ്പിക്കണം. ഫോണ്‍ : 0471 - 2347768, 0471 2347152, 0471 - 2347153, 0471 -2347156, 9544286928.Dt.1.3.2018.
************************
കൈറ്റ് വിക്ടേഴ്‌സ് ചാനലില്‍ ഫെബ്രുവരി 24 രാത്രി 9.15 ന് തെലുങ്ക് ചലച്ചിത്രം തിലദാനവും 29 ന് രാവിലെ 9.15 ന് മണിപ്പൂരി ചലച്ചിത്രം സനാബിയും സംപ്രേഷണം ചെയ്യും. കെ.എന്‍.ടി. ശാസ്ത്രി സംവിധാനം ചെയ്ത് 2002 ല്‍ പുറത്തിറങ്ങിയതാണ് തിലദാനം. അരിബാം ശ്യാം ശര്‍മ സംവിധാനം ചെയ്ത് 1994 ല്‍ പുറത്തിറങ്ങിയ സനാബിയില്‍ ജെ. സുശീലാ, ദേവന്‍, കിരണ്‍മാല തുടങ്ങിയവരാണ് അഭിനേതാക്കള്‍.Dt.23.2.2018.
************************
ഫെബ്രുവരി 24ന് നടത്തുന്ന എല്‍.എസ്.എസ്, യു.എസ്.എസ് പരീക്ഷ രാവിലെ 10.15 മുതല്‍ വൈകുന്നേരം മൂന്ന് മണിവരെ കേരളത്തിലെ വിവിധ പരീക്ഷാ കേന്ദ്രങ്ങളില്‍ നടത്തും. എല്‍.എസ്.എസ് പരീക്ഷയ്ക്ക് 79,715 കുട്ടികളും യു.എസ്.എസ് പരീക്ഷയ്ക്ക് 57,250 കുട്ടികളും രജിസ്റ്റര്‍ ചെയ്തിട്ടുണ്ട്.Dt.23.2.2018.
************************
പൊതുവിദ്യാഭ്യാസ സംരക്ഷണയജ്ഞത്തിന്റെ ഭാഗമായി 45000 ക്ലാസ്മുറികള്‍ ഹൈടെക്കാക്കുന്ന പശ്ചാത്തലത്തില്‍ ഡിജിറ്റല്‍ സംവിധാനം ഉപയോഗിച്ച് പഠിപ്പിക്കാന്‍ കഴിയുന്നതരത്തില്‍ എല്ലാ അദ്ധ്യാപകര്‍ക്കും അവധിക്കാലത്ത് പരിശീലനം നല്‍കാന്‍ പൊതുവിദ്യാഭ്യാസ സെക്രട്ടറി എ. ഷാജഹാന്റെ അധ്യക്ഷതയില്‍ നടന്ന വകുപ്പു ഡയറക്ടര്‍മാരുടെ യോഗം തീരുമാനിച്ചു. 'സമഗ്ര' റിസോഴ്‌സ് പോര്‍ട്ടല്‍ ഉപയോഗിച്ച് പഠിപ്പിക്കാനുള്ള പരിശീലനത്തിനാവശ്യമായ മൊഡ്യൂളുകളും ഡിജിറ്റല്‍ ഉള്ളടക്കവുമാണ് തയാറാക്കുന്നത്. ഡിജിറ്റല്‍ വിഭവങ്ങള്‍ ക്ലാസ്മുറിയില്‍ പ്രയോജനപ്പെടുത്താനും അക്കാദമിക് വിഷയങ്ങള്‍ കൂടുതല്‍ വ്യക്തതയോടെ കൈകാര്യം ചെയ്യാനും കഴിയുന്ന വിധത്തില്‍ മുന്‍കാല പരിശീലനങ്ങളിലെ അനുഭവം സ്വാംശീകരിച്ച് ഏറെ പുതുമയാര്‍ന്ന ഉള്ളടക്കമാണ് ഈ വര്‍ഷത്തെ അവധിക്കാല പരിശീലനത്തിന് തയ്യാറാക്കുന്നത്. ഇതിനായി അദ്ധ്യാപകരുടെ രജിസ്‌ട്രേഷന്‍, പരിശീലന ഷെഡ്യൂളിംഗ്, അറ്റന്റന്‍സ്, ഫീഡ്ബാക്ക് മുഴുവന്‍ കാര്യങ്ങളും ഓണ്‍ലൈനായി മോണിറ്റര്‍ ചെയ്യാന്‍ കൈറ്റ് സംവിധാനമൊരുക്കും. എസ്.സി.ഇ.ആര്‍.ടിയുടെ അക്കാദമിക് നേതൃത്വത്തില്‍ വിവിധ ഡയറക്ടറേറ്റുകളും എസ്.എസ്.എ., ആര്‍.എം.എസ്.എ. പ്രോജക്ടുകളും സംയുക്തമായാണ് മൊഡ്യൂള്‍ തയ്യാറാക്കുന്നത്. പരിശീലനത്തിന് അതത് മേഖലയിലെ വിദഗ്ധരെ ഉള്‍പ്പെടുത്തും.Dt.22.2.2018.
************************
45000 ക്ലാസ്മുറികള്‍ ഹൈടെക്കാകുന്ന പദ്ധതിയുടെ ഭാഗമായി ആദ്യഘട്ടത്തിലെ 21038 ക്ലാസ്മുറികളില്‍ മൗണ്ടിംഗ് കിറ്റ് ഇന്‍സ്റ്റലേഷനുള്ള നടപടിക്രമം പ്രസിദ്ധീകരിച്ചു. സ്‌കൂളുകള്‍ക്ക് ലഭ്യമാക്കിയിട്ടുള്ള പ്രൊജക്ടര്‍ മൗണ്ടിംഗ് കിറ്റ്, എച്ച്.ഡി.എം.ഐ കേബിള്‍, ഫേസ്‌പ്ലേറ്റ് എന്നിവ ഉപയോഗിച്ച് പ്രാദേശികമായി ലഭ്യമാകുന്ന വിദഗ്ധരുടെ സഹായത്തോടെ സ്‌കൂളുകള്‍ ഇന്‍സ്റ്റലേഷന്‍ പ്രവര്‍ത്തനങ്ങള്‍ നടത്തുന്നതിനുള്ള പരിശീലനം എല്ലാ ജില്ലകളിലും നടക്കുന്നു. ഇവ വിശദീകരിക്കുന്ന സര്‍ക്കുലറും മാര്‍ഗരേഖയും മുപ്പതു മിനിറ്റ് ദൈര്‍ഘ്യമുള്ള വീഡിയോയും കൈറ്റ് (കേരള ഇന്‍ഫ്രാസ്ട്രക്ചര്‍ ആന്‍ഡ് ടെക്‌നോളജി ഫോര്‍ എഡ്യൂക്കേഷന്‍) തയാറാക്കിയിട്ടുണ്ട്. ഇതോടൊപ്പം സ്‌ക്രീന്‍ ആവശ്യമില്ലാത്തയിടങ്ങളില്‍ ഭിത്തി പെയിന്റ് ചെയ്ത് പ്രതല സജ്ജീകരണം നടത്തുന്നതിന്റെ വിശദാംശങ്ങളും പ്രസിദ്ധീകരിച്ചിട്ടുണ്ട്. ഒരു ക്ലാസ്മുറിയില്‍ ഇന്‍സ്റ്റാള്‍ ചെയ്യുന്നതിന് പരമാവധി 1000 രൂപയും ഭിത്തി പെയിന്റ് ചെയ്ത് സ്‌ക്രീന്‍ ആക്കുന്നതിന് 1500 രൂപയും കൈറ്റ് ലഭ്യമാക്കും. ഹൈടെക് പദ്ധതിയിലുള്ള സ്‌കൂളുകള്‍ ഇതിനായി www.survey.itschool.gov.in ല്‍ ഫെബ്രുവരി 26 നകം ഓണ്‍ലൈനായി അപേക്ഷ സമര്‍പ്പിക്കണമെന്ന് കൈറ്റ് വൈസ് ചെയര്‍മാന്‍ കെ. അന്‍വര്‍ സാദത്ത് അറിയിച്ചു. സര്‍ക്കുലറുകളും വിശദാംശങ്ങളും www.kite.kerala.gov.in ല്‍ ലഭ്യമാണ്.Dt.22.2.2018.
************************
സംസ്ഥാന വികലാംഗക്ഷേമ കോര്‍പ്പറേഷന്‍ നടപ്പാക്കുന്ന, 40 ശതമാനത്തിനു മുകളില്‍ കാഴ്ച വെല്ലുവിളി നേരിടുന്ന പ്ലസ് ടു, ഡിഗ്രി, പി.ജി തുടങ്ങിയ കോഴ്‌സുകളും മറ്റ് സാങ്കേതിക വിദ്യാഭ്യാസം ഉള്‍പ്പെടെയുള്ള ഉന്നത തുടര്‍ വിദ്യാഭ്യാസ കോഴ്‌സുകളും പഠിക്കുന്ന വിദ്യാര്‍ത്ഥികള്‍ക്കുള്ള ലാപ്‌ടോപ്പ് വിതരണം ചെയ്യുന്ന പദ്ധതിയില്‍ അപേക്ഷ ക്ഷണിച്ചു. അപേക്ഷാഫോറം www.hpwx.kerala.gov.in എന്ന വിലാസത്തില്‍ ആപ്ലിക്കേഷന്‍ ഓഫ് ലാപ്‌ടോപ്പ് ഫോര്‍ വിഷ്വലി ഇംപേര്‍ഡ് എന്ന ലിങ്കില്‍ നിന്നും ഡൗണ്‍ലോഡ് ചെയ്യണം. ഫോറത്തില്‍ നിര്‍ദ്ദേശിച്ചിരിക്കുന്ന മാനദണ്ഡപ്രകാരം പൂരിപ്പിച്ച് സൂചനയിലെ രേഖകള്‍ ഉള്‍പ്പെടുത്തി മാനേജിംഗ് ഡയറക്ടര്‍, കേരള സംസ്ഥാന വികലാംഗക്ഷേമ കോര്‍പ്പറേഷന്‍, പൂജപ്പുര, തിരുവനന്തപുരം - 695012 എന്ന വിലാസത്തില്‍ മാര്‍ച്ച് അഞ്ചിന് മുമ്പ് സമര്‍പ്പിക്കണം. ഫോണ്‍ : 0471 - 2347768, 0471 2347152, 0471 - 2347153, 0471 -2347156, 9544286928.Dt.22.2.2018.
************************
2018-19 സാമ്പത്തിക വർഷത്തിൽ എം.സി.എം (മെറിറ്റ്-കം-മീൻസ്) സ്‌കോളർഷിപ്പ് ലഭിക്കുന്നതിന് സ്‌കൂളുകൾ, കോളേജുകൾ തുടങ്ങിയ വിദ്യാഭ്യാസസ്ഥാപനങ്ങൾ നാഷണൽ സ്‌കോളർഷിപ്പ് പോർട്ടലിൽ മാർച്ച് 31 നകം രജിസ്റ്റർ ചെയ്യണം. വിശദവിവരങ്ങൾ www.dtekerala.gov.in ലെ MCM scholarship എന്ന ലിങ്കിലും www.scholarship.gov.in ലും ലഭ്യമാണ്. Dt.20.2.2018.
************************
ഹയര്‍ സെക്കണ്ടറി പരീക്ഷകള്‍ക്കു മുന്നോടിയായി സ്‌കോള്‍ കേരള കൗണ്‍സലിംഗ്/മോട്ടിവേഷന്‍ ക്ലാസ് സംഘടിപ്പിക്കുന്നു. വിദ്യാര്‍ത്ഥികള്‍ക്കും രക്ഷകര്‍ത്താക്കള്‍ക്കും ഉണ്ടാകുന്ന മാനസിക സംഘര്‍ഷം ലഘൂകരിക്കുകയാണ് ലക്ഷ്യം. കേരള സര്‍വ്വകലാശാല തുടര്‍ വിദ്യാഭ്യാസവ്യാപന കേന്ദ്രത്തിന്റെ അക്കാദമിക സഹകരണത്തോടെയാണ് സംഘടിപ്പിക്കുന്നത്. തിരുവനന്തപുരം - ഗവ മോഡല്‍ ബോയ്‌സ് എച്ച്.എസ്.എസ്.എസ്., തൈക്കാട്, പത്തനംതിട്ട - ജി.എച്ച്.എസ്.എസ്. പത്തനംതിട്ട, ആലപ്പുഴ - ചേര്‍ത്തല ജി.എച്ച്.എസ്.എസ്, കോട്ടയം - ജി.എച്ച്.എസ്.എസ് ചങ്ങനാശ്ശേരി, ഇടുക്കി - ജി.ജി.എച്ച്.എസ്.എസ് തൊടുപുഴ, തൃശൂര്‍ - ഗവ: മോഡല്‍ ജി.എച്ച്.എസ്.എസ്. തൃശൂര്‍, കാസര്‍ഗോഡ് - ജി.എച്ച്.എസ്.എസ്. കുമ്പള, വയനാട് - ജി.എച്ച്.എസ്.എസ്. മീനങ്ങാടി, എന്നിവിടങ്ങളില്‍ ഫെബ്രുവരി 24 നും കൊല്ലം - ജി.എച്ച്.എസ്.എസ്. കരുനാഗപ്പള്ളി, എറണാകുളം - ജി.ജി.എച്ച്.എസ്.എസ്. കൊച്ചി, പാലക്കാട് - ഗവ: മോയന്‍സ് എച്ച്.എസ്.എസ്. പാലക്കാട്, മലപ്പുറം - ഗവ. രാജാസ് എച്ച്.എസ്.എസ്. കോട്ടയ്ക്കല്‍, കോഴിക്കോട്- ഗവ: മോഡല്‍ ബോയ്‌സ് എച്ച്.എസ്.എസ്. കോഴിക്കോട്, കണ്ണൂര്‍ - ജി.എച്ച്.എസ്.എസ് പള്ളിക്കുന്ന് എന്നിവിടങ്ങളില്‍ ഫെബ്രുവരി 25 നുമാണ് ക്ലാസ്സ്.Dt.22.2.2018.
************************
സെറ്റ് പരീക്ഷ ഫെബ്രുവരി 25ന് എല്ലാ ജില്ലാ ആസ്ഥാനങ്ങളിലുമുള്ള പരീക്ഷാ കേന്ദ്രങ്ങളില്‍ നടത്തും. സെറ്റ് പരീക്ഷ എഴുതാന്‍ അപേക്ഷ സമര്‍പ്പിച്ചിട്ടുള്ളവര്‍ ഹാള്‍ടിക്കറ്റുകള്‍ www.lbscentre.org, www.lbskerala.com എന്നീ വെബ്‌സൈറ്റുകളില്‍ നിന്നും ഡൗണ്‍ലോഡ് ചെയ്യണം. ഇവ തപാല്‍ മാര്‍ഗം ലഭിക്കില്ല. ഫോട്ടോ പതിച്ച ഒറിജിനല്‍ തിരിച്ചറിയല്‍ കാര്‍ഡ് ഹാജരാക്കാത്ത പരീക്ഷാര്‍ത്ഥികളെ പരീക്ഷ എഴുതാന്‍ അനുവദിക്കില്ല. ഫോണ്‍ : 0471 2560311, 312, 313.Dt.19.2.2018.
************************
മാര്‍ച്ചില്‍ നടക്കുന്ന എസ്.എസ്.എല്‍.സി പരീക്ഷയുടെ ഉത്തരക്കടലാസുകള്‍ മൂല്യനിര്‍ണയം നടത്തുന്നതിന് എച്ച്.എസ്.എമാരില്‍ നിന്നും അപേക്ഷകള്‍ ക്ഷണിച്ചു. യോഗ്യരായ അധ്യാപകര്‍ നിശ്ചിത ഫോര്‍മാറ്റിലുളള അപേക്ഷകള്‍ ഫെബ്രുവരി 20ന് മുമ്പ് പ്രഥമാധ്യാപകര്‍ക്ക് അപേക്ഷ നല്‍കണം. ഫെബ്രുവരി 21 മുതല്‍ പ്രഥാമാധ്യാപകര്‍ക്ക് iExaMS ല്‍ HM Login വഴി അപേക്ഷകളുടെ വിവരങ്ങള്‍ ഓണ്‍ലൈനായി സമര്‍പ്പിക്കാം. എല്ലാ അപേക്ഷകളും സമര്‍പ്പിച്ചശേഷം Confirm Button ല്‍ Click ചെയ്ത് അപേക്ഷകര്‍ സമര്‍പ്പണം പൂര്‍ത്തീകരിക്കണം. അവസാന തീയതി ഫെബ്രുവരി 28. മാര്‍ച്ച് അഞ്ച് മുതല്‍ പോസ്റ്റിംഗ് ഓര്‍ഡര്‍ ഡൗണ്‍ലോഡ് ചെയ്യാം.Dt.16.2.2018.
************************
2018 മാര്‍ച്ച് എസ്.എസ്.എല്‍.സി/ടി.എച്ച്.എസ്.എല്‍.സി ഹാള്‍ടിക്കറ്റ് പോര്‍ട്ടലില്‍ ലഭിക്കും. പരീക്ഷ എഴുതുന്ന റെഗുലര്‍ വിദ്യാര്‍ത്ഥികളുടെ ഹാള്‍ടിക്കറ്റ് ഐ എക്‌സാംസ് (iExaMS) HM, SUPDNT/PRINCIPAL ലോഗിനില്‍ ലഭ്യമാണ്. മുന്‍കൊല്ലങ്ങളില്‍ നിന്നും വ്യത്യസ്ഥമായി വിദ്യാര്‍ത്ഥിയുടെ പ്രാദേശിക ഭാഷയിലുള്ള പേരും നിരന്തരമൂല്യ നിര്‍ണയമാര്‍ക്കും ഉള്‍പ്പെടുത്തിയാണ് ഹാള്‍ടിക്കറ്റ് തയാറാക്കിയിട്ടുള്ളത്. ഫെബ്രുവരി 21 ന് മുമ്പ് എല്ലാ വിദ്യാര്‍ത്ഥികള്‍ക്കും ഹാള്‍ടിക്കറ്റ് വിതരണം ചെയ്യണമെന്ന് പരീക്ഷ ജോയിന്റ് കമ്മീഷണര്‍ അറിയിച്ചു. Dt.16.2.2018.
************************
സ്‌കോള്‍ കേരള മുഖേന 2017-19 ബാച്ചിലേക്ക് ഓണ്‍ലൈനായി രജിസ്റ്റര്‍ ചെയ്യുകയും പ്രവേശനം നിഷേധിക്കപ്പെടുകയും ചെയ്ത എന്‍.ഐ.ഒ.എസ് വിദ്യാര്‍ത്ഥികള്‍ക്ക് പ്രവേശനത്തിനായി പ്രത്യേക അവസരം നല്‍കുന്നു. നേരത്തേ രജിസ്റ്റര്‍ ചെയ്ത വിദ്യാര്‍ത്ഥികളുടെ പട്ടികയും മാര്‍ഗനിര്‍ദ്ദേശങ്ങളും www.scolekerala.org ല്‍ പ്രസിദ്ധീകരിച്ചിട്ടുണ്ട്. നിര്‍ദ്ദിഷ്ട രേഖകള്‍ സഹിതം ഫെബ്രുവരി 19, 20, 21 തീയതികളില്‍ സ്‌കോള്‍ കേരളയുടെ സംസ്ഥാന ഓഫീസില്‍ നേരിട്ടെത്തി പ്രവേശനം നേടാം. വിശദവിവരങ്ങള്‍ക്ക് 0471 - 2342950, 2342369.Dt.16.2.2018.
************************

 

Ranjith Kumar A.K